ماراثون الثانوية العامة !!

المارثون ابتدأ من شهر 8 يعني عدىٰ 5 شهور بتجري ، 5 شهور بتذاكر ، 5 شهور رايح جاي ع الدروس دلوقتي احنا ف شهر 1 و داخلين على شهر 2 ودول أكتر شهرين بنسمع عن التأجيل فيهم ، طب ليه ؟ عشان بكل بساطه انت ف مارثون ، والمارثون بيحتاج اللي نَفَسه طويل في بعض الشباب بيكونوا بدؤا بحماس وعُنفوان ودرسين وتلاتة ف المادة و 4 ملخصات ، من أول السنة ويجي دلوقتي خلاص مفيش نَفَس يكمل ، ف يحس بالملل والارهاق وإن خلاص مفيش طاقة يكمل فيأجل. على الجانب الاخر واحد بدأ مش ف دماغه ، كل شوية يقول هنشدّ ف الآخر ، ويجي دلوقتي يتفاجيء بالمنهج اللي عليه يلاقي عليه ف كل مادة باب واتنين وتلاته وهم بتاع 6 مواد ف يحس ان في جَبل على كتافه ، مش هيقدر يشيل ومفيش وقت يلم اللي وراه ويلاحق على الجديد فيأجل. أنت لازم تمسك العصا من المنتصف ، يعني تذاكر ومتهملش وكمان متضغطش على اعصابك عشان تقدر تكمل. خلاص هانت يا شباب ، هانت كلها شهور وتنتهي القصة وأنت ف إيدك تكتب نهايتها خلي والدك ووالدتك قدامك حافز ليك عشان تكمل. كل ما تيأس فكر ف دمعة الفرحة ف عين والدتك يوم النتيجة ، فكر ف تنهيدة الفرحة لما والدك يلاقيك جبت المجموع اللي نفسه فيه ميستحقوش تفرحهم ؟!!!! ميستحقوش انك تتعب الأيام اللي متبقية دي عشان تسعدهم ؟!!!! والدتك متستحقش تعوضها عن سهرها معاك الليالي !! والدك ميستحقش تعوضه عن تعبه ف الشغل عشان يجيبلك فلوس الكتب والدروس ؟ اوعى تكسر قلبهم التأجيل عذاب ليك قبل م يكون ليهم انت مش هتبقى شايل حمل المذاكرة بس ، انت هتبقى شايل حمل أكبر بكتير لما تلاقي زميلك اللي كنتوا ف الدروس مع بعض جاي يسلم على المدرس ويقول الدكتور الفلاني او المهندس الفلاني وانت قاعد بورقتك وقلمك ف نفس مكانك لما تلاقي نفسك ف الدرس وسط طلاب مش سنك لما يجي آخر الاسبوع وتلاقي زمايلك ف الشارع بيخرجوا وانت مضطر تقعد ف البيت عشان بتذاكر الالم النفسي دا أصعب بكتير جدا من المذاكرة الالم النفسي دا قادر يقتلك من جوه ،،، انت ف إيدك القرار ... اوعى تستلسم خلي دائماً قدامك قول سيدنا موسى عليه السلام "لأ أبرح حتى أبلغ"